შაბათს, 27 აგვისტოს, საქართველოს ლურჯი ფარის “ახალგაზრდა აქტივისტთა ბანაკის“ საინიციატივო ჯგუფმა რუსთავის დედაციხე დაასუფთავა. ძეგლი არაკეთილმოსურნე ვიზიტორების არასათანადო მოპყრობის შედაგად საყოფაცხოვრებო ნარჩენებით იყო დაბინძურებული. რუსთავის ციხე, რომელიც ისტორიული კუხეთის ტერიტორიას ეკუთვნის, თბილისის დაცვის ფუნქციას ასრულებდა და მნიშნველოვან ისტორიულ ძეგლს წარმოადგენს საქართველოს შუა საუკუნეების ისტორიასა და არქეოლოგიაში. აქციას შეუერთდნენ რუსთაველი მოხალისეები და რუსთავის ისტორიული მუზეუმის დირექტორი. აქციას მხარს უჭერდნენ ქალაქ რუსთავის მერია, შ.პ.ს. “მადაგონი” და არასამთავრობო ორგანიზაცია “სიდა”. აქცია აგრეთვე გაშუქდა “ქვემო ქართლის” ტელევიზიის ეთერში.
რუსთავის საინიციატივო ჯგუფის გარდა აქტივობებს გეგმავს “ახალგაზრდა აქტივისტთა ბანაკის” სხვა მოხალისეებიც. აქტივობები ეხება ისეთ საკითხებს, როგორიცაა იყალთოს რესტავრაცია, თელავის მწვანე მოხალისეთა დღე, ისლამური კულტურული მემკვიდრეობა, ატენის საცხენოსნო მარშრუტის შემუშავება და სხვა. ამ და სხვა პროექტების წარდგენა დაგეგმილია “აქტივისტთა ბანაკის” დახურვის ცერემონიაზე, რომელიც 2016 წლის 13 სექტემბერს გაიმართება. მოხალისეებს აგრეთვე გადაეცემათ მონაწილეობის დამადასტურებელი სერთიფიკატები და აქტივიზმის შესახებ SAVE-ის მიერ მომზადებული ქართულად ნათარგმნი სახელმძღვანელო.
