მე-14 საუკუნის წმინდა ბენედიქტეს ბაზილიკა ნორჩაში ძლიერი მიწისძვრის შედეგად დაინგრა. ბაზილიკა რეგიონში ერთ-ერთ ყველაზე მნიშვნელოვან სულიერ ცენტრად ითვლებოდა. მისი მხოლოდ წინა ფასადი გადარჩა. შენობა მოიცავდა 1621 წლის მხატვრობას “წმინდა ბენედიქტე და ტოტილა”, აგრეთვე შუა 1600-იანი წლების “ღვთისმშობელი და ნორჩას წმინდანები”.
ტაძარი იმ სახლის ნანგრევებზე მდებარეობდა, რომელიც წმინდა ბენედიქტეს დაბადების ადგილად მიიჩნევა. აგრეთვე, ბაზილიკის მარცხენა მხარეს შეიმჩნეოდა ანტიკური რომაული სტრუქტურა.
ბაზილიკა დაახლოებით 1290-1338 წლებში აშენდა. სამრეკლო მე-14 საუკუნეში აღმართეს, თუმცა 1703 წლის მიწისძვრის შედეგად მნიშვნელოვნად დაზიანდა. ამის გამო ის უფრო მცირე ზომის სამრეკლოთი ჩაანაცვლეს.
აღსანიშნავია, რომ ბერები არ დაშავებულან. მოსალოდნელია, რომ ტაძრის აღდგენის საქმეში მათ მნიშვნელოვანი როლი შეასრულონ.
მიწისძვრამ გაანადგურა ნორჩას წმინდა მარია არგენტეას ტაძარიც, რომელიც მე-15 საუკუნის ფრესკებით იყო ცნობილი. მიწისძვრა შეეხო ნორჩას ანტიკურ რომაულ კედლებსაც.
ეს არ არის პირველი დამანგრეველი მიწისძვრა იტალიისთვის. 2016 წლის აგვისტოში ცენტრალურ იტალიაში 6.2 მაგნიტუდის მიწისძვრამ 300-მე ადამიანის სიცოცხლე შეიწირა. მნიშვნელოვანი ზიანი მიადგა ეკლესიებს, საფლავების მონუმენტებსა და მუზეუმებს. ნანგრევებად იქცა ამატრიჩე, რომელიც გასულ წელს იტალიის ყველაზე ლამაზ ქალაქად დასახელდა. იქ 100-მდე ეკლესია იყო, რომელსაც შუა საუკუნეების ფრესკები, მოზაიკები და სკულპტურები ამშვენებდა. მე-15 საუკუნის წმინდა ავგუსტინეს ტაძრის ფასადის ნახევარი ჩამოიშალა. მიწისძვრას გადაურჩა ქალაქის მე-16 საუკუნის საათის კოშკი.